Tær snilld

Íslendingar eru lánsöm þjóð sem býr yfir miklum og góðum náttúruauðlindum og er kalda vatnið ein þeirra.  Þó er það svo að það er ekki sjálfgefin staðreynd að allstaðar á Íslandi sé hægt að fá aðgang að nægu hreinu og góðu vatni.  Meira að segja hér á landi fáum við annað slagið af því fréttir að þurrkatíð hafi áhrif á mögulegt aðgengi að þessum "sjálfsögðu" lífsgæðum.  Þá þarf einnig að hafa í huga að það getur þurft að leggja í verulegan kostnað við að afla og flytja vatn til íbúa sveitarfélaga.  Í þessu samhengi þarf einnig að muna að það er mikill munur á svo nefndu grunnvatni annars vegar og lindarvatni hins vegar.  Það er góð regla að fara vel með kalda vatnið nýta það sparlega og ekki láta renna að óþörfu.