Umhverfismál

Neyslumynstur og lífstíll hins almenna borgara ráða miklu um stöðu og þróun umhverfismála. Þrátt fyrir að athafnir hvers og eins virðist smáar og léttvægar, þá hafa þær sameiginlega afgerandi áhrif á umhverfi okkar bæði nær og fjær.

Á undanförnum árum hefur mátt merkja aukna vakningu í umhverfismálum á Íslandi. Hennar hefur meðal annars gætt í umræðu fjölmiðla um nauðsyn þess að huga að því sem hver og einn getur gert til að stuðla að verndun umhverfis og auðlinda.
Umgengni fyrirtækja við náttúru landsins, auðlindir og umhverfi hefur tekið stakkaskiptum á síðustu áratugum, bæði vegna frumkvæðis fyrirtækjanna sjálfra og almennra viðhorfsbreytinga og eins vegna alþjóðlegra reglna og skuldbindinga sem hvatt hafa til umbóta.