Framkvæmdir við vatnsveitu á Svalbarðsströnd ganga vel

Framkvæmdir við vatnsveitu á Svalbarðsströnd ganga samkvæmt áætlun.  Það er Vinnuvélar Símonar Skarphéðinssonar ehf. sem sér um framkvæmd verksins en félagið átti lægsta tilboð í verkið.

Vatnsveituframkvæmdirnar eru varrúðarráðstöfun þar sem talinn er möguleiki á því að til vatnsþurrðar geti komið í Halllandsbólum sem í dag þjóna suðurhluta Svalbarðsstrandarhrepps þegar göng verða gerð í gegnum Vaðlaheiðina.  Með framkvæmdinni tengist Halllandsbyggðin Garðsvíkurlindum sem í dag þjóna norður hluta Svalbarðsstrandarhrepps.

Þá er einnig gert ráð fyrir þeim möguleika að vatnsveita Vatnsveitufélags Kaupvangssveitar geti tengst Garðsvíkurveitunni þar sem einnig kann að koma til vatnsþurrðar í vatnsbólum í landi Varðgjár samhliða gangagerðinni.