Hitaveitur Norðurorku
Hér má sjá yfirlit yfir veiturnar í þeirri röð sem þær hafa verið byggðar upp.
- Hitaveita Ólafsfjarðar 1944 (sameinaðist Norðurorku hf. árið 2005)
- Hrísey 1972 (sameinaðist Norðurorku hf. árið 2004)
- Hitaveita Akureyrar 1977 (sameinaðist Vatnsveitu Akureyrar árið 1993 og Rafveitu Akureyrar árið 2000)
- Hitaveita Hrafnagilshrepps 1987 (sameinaðist Norðurorku hf. árið 2008)
- Hitaveita Svalbarðsstrandarhrepps 1980 (sameinaðist Norðurorku hf. árið 2003)
- Reykjaveita 2005 (byggð upp í samstarfi við Grýtubakkahrepp og Þingeyjarsveit)
Eins og sjá má af ofangreindri upptalningu eru flestar veiturnar á veitusvæði Norðurorku í upphafi í eigu viðkomandi sveitarfélaga og hafa verið byggðar upp sem slíkar. En þó hafa nokkur sveitarfélög verið hitaveituvædd samhliða vinnslu jarðvarma innan þeirra vébanda og lagningu stofnlagna frá vinnslusvæðunum til Akureyrar, á það m.a. við um hluta Glæsibæjarhrepps (1990) og Hrafnagilshrepps (1978). Þá var gerður sérstakur samningur við Öngulsstaðarhrepp (1977) um uppbyggingu veitu í stórum hluta hreppsins samhliða uppbyggingu Hitaveitu Akureyrar á sínum tíma. Glæsibæjarhreppur er í dag hluti af sveitarfélaginu Hörgársveit og Öngulsstaðarhreppur og Hrafnagilshreppur eru hluti af Eyjafjarðarsveit.
Vatnsveitur Norðurorku
Vatnsveita Akureyrar var stofnuð árið 1914 en auk þess að reka vatnsveitu á Akureyri rekur Norðurorka vatnsveitur í Hrísey, Svalbarðsstrandarhreppi, í hluta af Eyjafjarðarsveit og Hörgársveit. Vatnsveituna í Svalbarðsstrandarhreppi keypti Norðurorka árið 2003. Vatnsveituna í Hrísey keypti Norðurorka af Akureyrarbæ eftir að Hrísey sameinaðist Akureyri árið 2004. Vatnsveituna í Reykárhverfi, við Syðra Laugarland og Saurbæ keypti Norðurorka af Eyjafjarðarsveit árið 2009. Vatnsveita kom í hluta Hörgársveitar samhliða lagningu stofnlagnar frá Vöglum í Hörgárdal til Akureyrar.
Helstu vatnstökusvæði vatnsveitu Akureyrar eru Hesjuvallalindir sem virkjaðar voru árið 1914, Sellandslindir á Glerárdal sem virkjaðar voru árið 1956 og loks Vaglalindir í Hörgárdal sem virkjaðar voru árið 1972.
Vatnsveita Akureyrar hlaut gæðavottun árið 1998 og samkvæmt gæðakerfi Norðurorku er í gildi sérstakur samningur við Heilbrigðiseftirlit Norðurlands eystra um reglubundið eftirlit með veitunni og vatnslindum.
Rafveita Norðurorku
Rafveita Akureyrar var stofnuð árið 1922 og varð hún hluti af sameinuðum veitustofnunum árið 2000. Með lögum frá árinu 2003 var ákveðið að gera breytingar sem eiga að hafa það markmið að koma á samkeppnismarkaði í framleiðslu og sölu á raforku. Þetta felur í sér að skilið er á milli þriggja megin þátta, (1) raforkuframleiðslu og sölu, (2) flutnings og loks (3) dreifingar. Í þessu felst að raforkuframleiðsla og sala á að vera í höndum sjálfstæðra fyrirtækja sem keppa á samkeppnismarkaði. Hins vegar var ákveðið að stofna sérstakt fyrirtæki, Landsnet sem sér um flutning raforkunnar frá framleiðendum til stórnotenda og dreifiveitna í sveitarfélögunum. Í sveitarfélögunum og sveitum landsins taka síðan dreifiveiturnar við og sjá um að koma rafmagninu til viðskiptavina, íbúðarhúsnæðis og fyrirtækja.
Norðurorka uppfyllti framangreindar lagakröfur með því að skilja á milli dreifingar og framleiðslu og sölu. Í dag sér Norðurorka um dreifinguna og hefur til þess sérleyfi á Akureyri en Fallorka dótturfyrirtæki Norðurorku sér um framleiðslu og smásölu á raforku og er fyrirtækið með viðskipti um allt land. Mest af raforkunni sem Fallorka selur kaupir hún í heildsölu af framleiðendum og þar er Landsvirkjun langstærsti seljandinn.
BAKVAKT