Árið 1986 var tekin ákvörðun um að sameina undir eina stjórn Vatnsveitu Akureyrar, Rafveitu Akureyrar og Hitaveitu Akureyrar og hún nefnd stjórn veitustofnanna. Má ef til vill segja að með því hafi verið lagður grunnur að sameiningu fyrirtækjanna.
Fyrsta raunverulega skrefið var þó ekki stigið fyrr en Hitaveitan og Vatnsveitan voru sameinaðar í Hita- og Vatnsveitu Akureyrar 1. janúar 1993 en sami framkvæmdastjóri hafði þá verið yfir þessum tveimur veitustofnunum í rúm tvö ár. Samtímis fluttist starfssemi og starfsfólk Hitaveitunnar í nýbyggt hús, viðbyggingu við hús Vatnsveitunnar við Rangárvelli.
Samruni Hita- og Vatnsveitu Akureyrar (HVA) og Rafveitu Akureyrar (RA) sem nú eru innan vébanda Norðurorku hf. kann að hafa orðið fyrr en ella þar sem bæjaryfirvöld ákváðu að selja húsnæði RA við Þórsstíg og að byggt skyldi við húsnæði HVA á Rangárvöllum fyrir starfssemi RA. Upphaflega var ætlunin að reka HVA og RA sem tvær stofnanir en samnýta húsnæðið eins og mögulegt væri.
Stofnað var sérstakt félag til að annast og eiga byggingar á Rangárvöllum, Eignarhaldsfélagið Rangárvellir ehf., en því félagi stjórnaði Kristján Baldursson tæknifræðingur sem jafnframt sá um allt byggingaeftirlit. Félagið var í eigu HVA, RA og Akureyrarbæjar en þá þegar voru uppi hugmyndir um flutning fleiri stofnana Akureyrarbæjar á Rangárvellina eins og síðar varð. Norðurorka keypti síðar hlut Akureyrarbæjar og félagið var lagt niður. Norðurorka hf. á allar húseignir á lóð fyrirtækisins við Rangárvelli en leigir stofnunum Akureyrarbæjar og fleirum nokkurn hluta þeirra.
Hugmyndir um endanlega sameiningu HVA og RA fóru að gerjast snemma árs 2000. Í bókun veitustjórnar frá 21. febrúar árið 2000 segir. „Veitustjórn leggur til við bæjarstjórn að hafinn verði undirbúningur að sameiningu orkufyrirtækja Akureyrarbæjar og taki sameiningin gildi 1. janúar 2001“. Bæjarstjórn samþykkti það samhljóða. Veitustjórn lagði síðan til við bæjarstjórn á fundi sínum þann 28. mars 2000 að Franz Árnason framkvæmdastjóri HVA yrði ráðinn yfirmaður sameinaðs orkufyrirtækis Akureyrarbæjar frá og með 1. ágúst 2000 og samþykkti bæjarstjórn það samhljóða. Því varð sameiningin í raun þann 1. ágúst en fjárhagsleg sameining varð frá og með 1. janúar 2001.
Í framhaldi af samþykkt um sameiningu HVA og RA var unnið að skipuriti og skipulagi hins nýja orku-og veitufyrirtækis sem gekk undir vinnuheitinu „Akureyrarveitur“ og var skipurit og annað skipulag samþykkt endanlega þann 30. ágúst árið 2000. Daginn eftir, 1. september árið 2000 fluttu starfsmenn RA á Rangárvellina og þar með var sameiningin fullnustuð.
Ákveðið var að efna til einskonar samkeppni um nafn á hina nýju stofnun eða fyrirtæki. Fimmtíu tillögur að nafni bárust og á fundi 22. september samþykkti stjórnin nafnið Norðurorka en sú tillaga kom frá Hlyni Kristjánssyni sem þá var starfsmaður „Akureyrarveitna“. Segja má að sameiningin hafi gengið nokkuð vel þó svo að gamlar hefðir og venjur hvors aðila um sig hafi valdið titringi á stundum. Þetta var ekki ólíkt því þegar Hitaveitan og Vatnsveitan voru sameinaðar sjö árum áður. Nær allir þeir sem störfuðu hjá veitunum fyrir sameiningu kusu að starfa áfram hjá fyrirtækinu.
Norðurorka verður að hlutafélagi.
Norðurorka varð sjálfstætt fyrirtæki þann 1. janúar 2003 en þá voru samþykkt sérstök lög á Alþingi um Norðurorku hf. Eftir það fékk stjórn fyrirtækisins endanlegt ákvörðunarvald um málefni félagsins en áður var það í höndum bæjarstjórnar þar sem allar ákvarðanir veitustjórnar, eins og hún hét til 1. janúar 2003, þörfnuðust staðfestingar bæjarstjórnarinnar. Nú eru sex aðilar hluthafar í Norðurorku hf. en langstærstur þeirra er Akureyrarbær.
Fyrstu tíu árin.
Á þeim árum sem liðin eru frá sameiningu hefur auðvitað ýmislegt gerst hjá fyrirtækinu eins og vera ber og hægt er að kynna sér í ársskýrslum fyrirtækisins. Ekki hefur verið um kyrrstöðu að ræða og sótt hefur verið fram eftir getu, einkum hefur áhersla verið lögð á að treysta innviðina og tryggja afhendingaröryggi þeirrar vöru sem Norðurorka selur viðskiptavinum sínum.
BAKVAKT