Framleiðslan

Verksmiðjan er hönnuð fyrir 300.000 lítra ársframleiðslu.

Framleiðslan er einstök að því leyti að hún nýtir hreina íslenska orku til að breyta úrgangi í eldsneyti. Í ferlinu er úrgangurinn hvarfaður við metanól. Orkey leggur metnað í að nota eins umhverfisvænt metanól og fæst hverju sinni.

Framleiðslan skiptist í þrjá fasa.

Hreinsun. Við upphaf ferlisins er notuð steikingarolía hreinsuð og svo dælt í forðageymi þar sem hún hitnar og blandast saman. Olíublandan fer svo í gegnum síur, þaðan í gegnum þurrkun sem fjarlægir vatn og svo er blöndunni dælt í annan forðageymi.

Estrun. Næsta þrep er sjálft efnahvarfið sem gerist í tveimur skrefum. Í fyrra skrefinu fer fram estrun frírra fitusýra. Olíur og fitur geta innihaldið svokallaðar fríar fitusýrur sem geta tært málma í vélum og eru því óæskilegar í lífdíselolíunni. Seinna hvarfskrefið er svokölluð umestrun fitusýruglýseríða. Að umestrun lokinni er blöndunni dælt í forðageymi fyrir flasseimingu. Það sem gerir ferli Orkeyjar einstakt er endurnýting á metanóli í framleiðsluferlinu.

Þvottur og þurrkun. Eftir annan fasa eru ýmis óhreinindi og leifar efnahvata eftir estrun og umestrun í afurðinni. Til að losna við þau er lögurinn þveginn með vatni í þvottatönkum. Þvotturinn felur einnig í sér hlutleysingu og eru fríar fitursýrur, glýseról, metanól og ýmis sölt fjarlægð í þvottakerfinu. Að lokum er lífdísillinn þurrkaður og vatn fjarlægt. Tilbúnum lífdíslinum er þá dælt aftur á 1000 lítra tanka.