Rafveita Akureyrar var stofnuð árið 1922 og fyrsta verkefni hennar var virkjun Glerár sem byggð var í landi Bandagerðis á árunum 1921 og 1922. Á þessum árum voru starfræktar þrjár rafstöðvar í bænum og fengu 36 hús rafmagn frá þeim. Samhliða byggingu virkjunarinnar var unnið að því að reisa dreifikerfi í bænum sem þá var allt í loftlínum. Þann 30. september árið 1922 hófst rafmagnsframleiðsla í Glerárvirkjun og straumi hleypt á dreifkerfi bæjarins.
Síðar virkjaði Rafveitan Laxá í Aðaldal og tók fyrsta virkjunin til starfa árið 1939. Glerárstöð var ekki í stöðugri notkun eftir að Laxárvirkjun tók til starfa en var keyrð þegar á þurfti að halda fram á árið 1960. Nýtt fyrirtæki, Laxárvirkjun, tók til starfa með tilkomu virkjunar 2 í Laxá árið 1954. Það rann síðan inn í Landsvirkjun og Akureyringar eignuðust hlut í því fyrirtæki.
Eftir þessa breytingu varð meginverkefni Rafveitu Akureyrar fyrst og fremst að þjóna Akureyringum með því að byggja upp og reka traust og öruggt dreifikerfi á Akureyri. Mikil breyting varð á dreifikerfinu þegar loftlínurnar voru lagðar af og strengir þess í stað lagðir í jörðu. Auk þess að sjá um dreifingu á raforkunni sá Rafveitan um að kaupa raforku í heildsölu og endurselja hana til viðskiptavina á Akureyri.
Þetta breyttist síðar með raforkulögum frá árinu 2003 þegar skilið var á milli dreifingar og sölu á raforku sem varð til þess að Norðurorka hf. stofnaði dótturfélagið Fallorku ehf. sem framleiðir sjálft raforku auk þess að kaupa hana í heildsölu og selja til viðskiptavina um land allt.
BAKVAKT