19. nóv 2021

Alþjóðlegi klósettdagurinn er í dag!

Hreinsistöð fráveitu í Sandgerðisbót Akureyri var tekin í notkun í lok árs 2020.
Hreinsistöð fráveitu í Sandgerðisbót Akureyri var tekin í notkun í lok árs 2020.

Á hverju ári má ætla að tæplega 200 tonn af ýmsum óæskilegum úrgangi berist í fráveitur um allt land. Það þýðir að um hálft kíló af rusli fer í klósettin eða niðurföll á hvern íbúa á landinu. Eitt af stóru verkefnum fráveitna á Íslandi er að minnka úrgang í fráveitu með því að minna á að klósettið er ekki ruslafata!  Úrgangurinn skaðar lífríkið, þyngir rekstur fráveitukerfa og eykur kostnað sveitarfélaga vegna hreinsunar og förgunar á úrgangi.

Í lok árs 2020 var hreinsistöð fráveitu í Sandgerðisbót á Akureyri tekin í notkun. Fyrstu 11 mánuði ársins 2021 hafa tæplega 17 tonn af óæskilegum úrgangi verið síuð frá fráveituvatni í hreinsistöðinni. 

Klósettið er ekki ruslafata

Í fráveitukerfi Akureyringa eru margar dælur sem sjá til þess að fráveituvatn berist að Sandgerðisbót í nýju hreinsistöðina og þaðan er því veitt út í sjó. Það er mikilvægt að muna að t.d. blautklútar eiga ekki heima í fráveitukerfinu vegna þess að þeir, ásamt öðrum hlutum sem því miður eiga til að lenda í klósettinu, geta stíflað lagnir og skemmt dælubúnað.

Hér að neðan má sjá auglýsingu sem Norðurorka hefur verið að birta um óleyfilegt niðurhal. Þegar smellt er á mynd opnast hún í PDF formi og er því skýrari, t.d. til útprentunar. 

              

 Við hvetjum ykkur til að prenta myndirnar út og hengja upp á viðeigandi stöðum, þannig hjálpumst við öll að við að minna á :-)

Verkefnið "Bara piss, kúk og klósettpappír í klósettið"

Verkefnið "bara piss, kúk og klósettpappír í klósettið" er samvinnuverkefni Umhverfisstofnunar og Samorku í samstarfi við Samband íslenskra sveitarfélaga og heilbrigðisnefnda á landinu og er markmið þess að draga úr rusli í fráveitu og þar með álagi á umhverfið okkar. Á vefsíðu verkefnisins má finna ýmsan fróðleik og kynningarefni - www.klosettvinir.is

Til hamingju með alþjóðlega klósettdaginn í dag!